Tonhito de Poi vai presentar este venres 14 en Santiago, na Sala Moon Music Club, o seu novo vídeo-clip, Delirando, pertencente ao novo traballo do seu proxecto persoal, Poi, o EP Sicodelia, logo da súa frutífera andaina cos Heredeiros da Crus. A apertura de portas será ás 20.30 h e a entrada gratuíta.
Tonhito de Poi
Natural desa máxica fronteira de mestizaxe entre Martín e Castiñeiras (Ribeira) chamada Poi, Tonhito de Poi ten máis de 30 anos de experiencia enriba dos escenarios, comezando a súa carreira artística cos Heredeiros da Crus, que compaxinará cunha andaina experimental en solitario inspirado polas súas viaxes na selva amazónica. Fóra da música, Tonhito adicouse tamén a outros ámbitos do audiovisual traballando na radio, a televisión e o cinema.
Na súa nova andadura vén acompañado do músico e produtor Míster Vieito, a técnica de son e produtora musical Morqui, eo baixista e contrabaixista Pachi Cruz.
Poi é unha banda fundada por Tonhito e Morqui a raíz da gravación do disco In-Dios, unha homenaxe ao indio que cada un de nós leva dentro. Ao proxecto uníronse Pachi Cruz e Diego Vieito, bautizando o estilo desta nova criatura da música galega como “Poi Floyd”, un encontro entre o sonoridade de Poi e a sinfonía que rock, a música electrónica e a música chamánica.
