O BNG de Outes presenta a súa candidatura para “liderar o goberno” e “abrir un tempo novo no concello”

21 Abril 2023

O BNG de Outes vén de facer pública a súa candidatura completa. Un total de 22 persoas, 11 homes e 11 mulleres, fan parte da lista da agrupación nacionalista en Outes para as eleccións municipais do 28 de maio. Logo de anunciarse a Anxo Núñez Fernández coma candidato á alcaldía en decembro, a organización fixo un intenso traballo para confeccionar o que sería, en palabras do grupo, “o mellor equipo posíbel para dar forma ao goberno que Outes precisa”.

Anxo Núñez Fernández

Segundo explicaron, a candidatura “combina o saber facer de 9 candidatas con ampla experiencia e veteranía no BNG xunto coa forza e ideas novas dunha gran ampliación con 13 novas compañeiras”. Tamén puxeron o foco nos firmes alicerces da proposta: “O BNG é un equipo forte e cohesionado que ten un proxecto claro de futuro para o noso concello e ten a paixón para levalo adiante”.

En palabras de Anxo Núñez “O BNG sae a por todas. A partir deste 28 de maio queremos liderar o goberno de Outes para sacalo da súa parálise e comezar a converternos nun referente de boa xestión. Temos o equipo perfecto, o proxecto e as ganas para podermos asegurar que o BNG é a única alternativa que pode garantir un goberno aberto a toda a veciñanza e que realmente atenda as

necesidades do noso territorio”.

Engadiu que “nestas eleccións só hai dúas opcións: seguir no inmobilismo e na decepción da última década ou apostar polo cambio transformador do BNG en Outes. Levamos tempo recibindo moitas mensaxes de apoio e ilusión. O BNG está en moi bo momento e estamos seguros de que nestas eleccións imos dar a sorpresa en Outes”.

A número 2 da candidatura, Sol Agra, apuntou que “en Outes témolo todo, precisamos coidar o que está feito e escoitar o que precisa a xente que vive aquí. Temos unha visión de como queremos que sexa o noso concello que inclúe proxectos novidosos e con futuro, pero sen esquecer que o primeiro é ter as estradas sen fochas e as cunetas rozadas”.

O BNG, engadiu, “non se para no personalismo e ofrece un equipo traballador e cohesionado que o dará todo, e máis, para que nas vindeiras eleccións de maio Outes abra un tempo novo”.

Outros artigos

Publicidade

Revista en papel

Opinión

“Enfermedades terminales”. José Manuel Pena

“Enfermedades terminales”. José Manuel Pena

Estos últimos días las visitas al hospital fueron frecuentes para acompañara un buen amigo que se encuentra viviendo unos difíciles momentos por sudelicado estado de salud. Esta circunstancia me abrió un poco más los ojos ala realidad del sufrimiento, el dolor, el...