A directora de Turismo de Galicia, Nava Castro presentou este sábado 1 de abril as novas axudas da Xunta para o embelecemento do litoral, destinadas a concellos e establecementos turísticos, que contan cun orzamento de máis de 6,5M€.
Segundo fixo saber, o Plan Litoral de Galicia, aprobado no marco do Plan de Recuperación, Transformación e Resiliencia (e financiado pola UE ao abeiro dos Fontos NextGeneration), conta cunha dotación orzamentaria de 29,3 M€, achegando 3 Accións de Cohesión en Destinos (ACD), promovidas pola Xunta de Galicia por importe de 11,3 millóns de euros, e 10 Plans de Sustentabilidade Turística en Destino impulsados por entidades locais, mancomunidades e Deputacións por importe de 18 millóns de euros, entre as cales está o concello de Marín, que porá en marcha o PSTD Marín, dotado con 2M€
As axudas ao embelecemento enmárcanse na ACD Rehabilitación de recursos emblemáticos do litoral galego. Estes apoios teñen como obxectivo principal “fomentar actuacións de rehabilitación de espazos singulares, promover accións que contribúan a unha maior integración coa paisaxe e respecto dos valores ambientais, a dixitalización de recursos con potencial turístico, así como a mellora da fachada turística e a corrección de impactos paisaxísticos en zonas costeiras”.
Distínguense dúas liñas de axuda, unha dirixida a concellos, cun importe de 4.475.000 euros, e outra dirixida a establecementos turísticos, cun importe de 2.075.000 euros.
Nas axudas a concellos o orzamento divídese en tres liñas de actuación subvencionábeis: transición verde e ecolóxica, cun orzamento de 2.700.000 €, transición dixital, cun orzamento de 675.000 € e transición accesíbel e inclusiva, cun orzamento de 1.100.000 €.
Na liña de axudas dirixida a establecementos turísticos poderán ser persoas beneficiarias as persoas físicas e xurídicas titulares de establecementos turísticos de aloxamento e de restauración situados en municipios costeiros, que teñan autorizado ou clasificado o establecemento no Rexistro de Empresas e Actividades Turísticas da Xunta de Galicia.
Poderán solicitalas os establecementos hoteleiros, campamentos de turismo, establecementos de turismo rural, apartamentos turísticos e albergues turísticos; así como restaurantes, cafeterías e bares.
Estas axudas a establecementos turísticos divídese en dúas liñas de actuación obxecto de subvención: tecnoloxías ambientais, cun orzamento de 1.125.000 € e mellora da fachada turística do litoral, cun orzamento de 950.000 €.
