A asociación xuvenil Vivir en Corrubedo programou para a xornada deste xoves con motivo da celebración da Semana Santa unha xornada festiva a partir das cinco da tarde dentro do que se deu en chamar Pascua en Corrubedo. Ademais das misas solemnes que se oficiarán ás 17.00 e 21.00 horas no templo parroquial, na contorna da zona portuaria terán lugar desde as cinco dos tarde talleres infantís, inchables, unha chocolatada e un espectáculo de clown e maxia con “Aeiou”. E ás nove da noite está previsto que nun gran escenario empecen os concertos das bandas ribeirenses Os Bugis, que conmemorará o seu décimo aniversario, e Amores de barra. mentres que a partir da medianoite empezará a actuación de Chocolate Discomóvil con DJ Maikstyle. A entidade organizadora, que preside Abdón Santos, e que conta cun bo número de colaboradores, indicou que se coordinou coa igrexa parroquial para que non soe música algunha durante as celebracións litúrxicas que poida molestar.
