Dende a ANPA do CEIPP de Palmeira informaron da presentación, este mes de abril, do libro A Tiempo, de Ana María García López, ex-alumna do dito colexio. A presentación virá acompañada da doazón dun exemplar asinado pola escritora a través da Asociación de Pais e Nais do colexio e, ademais, a autora participará nun coloquio sobre a súa obra cun grupo de alumnos e alumnas do centro educativo que están a ler esta tempada o seu libro.
Será o vindeiro mércores 26 de abril ás 10h, na Biblioteca do Colexio de Palmeira, conmemorando así a proximidade do día do Libro neste ano 2023.
Pero ademais, durante o mes maio centro educativo recibirá a visita da poeta boirense Anxos Castro Parada, autora da nosa comarca. Esta actividade será posíbel grazas á xestión do Equipo da Biblioteca “A Cova de Agapito”. Concretamente será o mércores 10 de maio ás 10h. tamén na Biblioteca do Colexio.
Anxos Castro é responsábel do libro de poemas Conversas comigo mesma & Emociones arrítmicas, editado polo selo madrileño Diversidad Literaria. Trátase dunha escolma poética de 160 páxinas, en galego e en castelán, na que a autora recolle pezas escritas ao longo de toda a súa traxectoria vital, dende a nenez. Nesta colección vital, Anxos Castro defende a poesía como “a forma máis máxica de comunicación de cantas existen”, que, asegura, “permíteme expresar co que máis me gusta, coa pluma, plasmando sobre o papel todas as miñas emocións”. O libro, explicaba nunha entrevista recente con La Voz, “contén toda a miña traxectoria literaria, desde que tiña 13 anos ata a actualidade, pois sempre fun gardando os poemas que xurdían de todo aquilo que me inspiraba ou me emocionaba”.
