O BNG de Outes lanzou unha comunicación na que debulla as necesidades do concello en materia de sanidade e atención. As declaracións do voceiro de SOS sanidade pública e doutor en Atención Primaria, Xosé Dios Diz, e o candidato á alcaldía do BNG, Anxo Núñez Fernández, que podemos visualizar en liña, poñen o foco no Centro de Saúde de Outes, que, segundo din, atópase nunha situación límite.
Núñez explica que “dende o BNG de Outes consideramos inaceptábel a situación actual na que os doutores que quedan teñen que atender arredor de 45 doentes ao día, o que dificulta moito a atención pausada e de calidade que require un servizo fundamental coma este. Non se pode admitir ter menos de 10 minutos para estudar un historial, diagnosticar e atender ao doente”.
E engaden: “O Partido Popular non pode repetir continuamente que defende os intereses do rural cando despois, a súa xestión nefasta, nos deixa sen os servizos máis básico. Dende o BNG témolo claro: apostamos por uns servizos públicos dignos e de calidade”.
E conclúen: “É por iso polo que demandamos á Xunta do Partido Popular a que cubran as baixas e doten o Centro de Saúde de Outes do persoal que necesita de maneira urxente”.
—
