Finalmente e co inicio do mes de marzo abriu as súas portas a nova Escola Infantil Municipal de Outes. Situada nas instalacións do antigo colexio vello do Cruceiro de Roo, este novo centro representa en palabras do Concello “un paso adiante para a mellora da conciliación no noso municipio”. Así se expresou o alcalde, Manuel González, na apertura formal do inmóbel.
O centro, que conta con 30 prazas, foi posíbel grazas ao traballo conxunto do Goberno local, a Deputación da Coruña e o Executivo autonómico, que achegou unha axuda de 62.000 euros para a materialización do proxecto na sede do antigo CEIP Emilio de Navasqües (Cruceiro de Roo). Esta actuación supuxo ampliar en 10 prazas o actual Punto de Atención á Infancia (PAI) de Outes que se converte así nunha escola infantil.
A rehabilitación do edificio significou un investimento de máis de 400 mil euros, con fondos procedentes da Xunta, a Deputación da Coruña e do propio Concello.
O alcalde Manuel González informou recentemente que a Administración local ten tamén “un proxecto para habilitar na planta superior do antigo CEIP Emilio de Navasqües un pequeno fogar residencial para oito persoas maiores”.
