Afortunadamente, o deportista coa axuda dunha persoa particular que se atopaba no lugar, logrou desamarrar os cables do equipo que portaba e que o mantiveron unido á ponte durante un breve período de tempo, tirouse ao mar e nadou ata a beira. Alí o agardaban os servizos de emerxencia.
A chamada ao 112 Galicia foi realizada ao fío das 16:45 horas. Nese momento, o alertador indicaba que un parapentista necesitaba axuda tras enganchar os cables do seu equipo na estrutura da ponte da Illa de Arousa. Ao mesmo tempo, indicaba que o deportista estaba ben e que non parecía necesitar asistencia sanitaria.
Os xestores do 112, nada máis recibir a chamada do alertador, pasaron aviso aos axentes da Garda Civil, da Policía Local e da Policía Autonómica, aos Bombeiros do Salnés e tamén ás autoridades responsables polo control aéreo na zona. Igualmente, desde o Centro Integrado de Atención ás Emerxencias de Galicia púxose a situación en coñecemento do equipo de Urxencias Sanitarias, por se nalgún momento fose necesaria a súa intervención.
Poucos minutos despois, os axentes da Policía Local contactaron co 112 para informar de que a persoa xa se atopaba en terra e en bo estado de saúde.
