O delegado da Xunta na Coruña, Gonzalo Trenor, e a xerente da área sanitaria de Santiago e Barbanza, Eloína Núñez, mantiveron este martes 28 de febreiro unha reunión co alcalde de Noia, Santiago Freire, e coa alcaldesa de Muros, María Inés Monteagudo, para avanzarlles que Goberno galego incluirá unha praza de médico de familia e outra de pediatra no Centro de Saúde de Noia e unha praza de médico de familia en Muros. Farase na convocatoria de prazas de difícil cobertura e mediante o concurso de méritos que se aprobará nos vindeiros días. Amais estabilizarase outra praza de pediatra en Mazaricos.
Esta convocatoria de máis de 400 prazas, avanzada este mes polo presidente da Xunta, Alfonso Rueda, realizarase ao abeiro da Lei 2/2022 de medidas extraordinarias para a provisión de postos de difícil cobertura, aprobada o pasado outubro polo Parlamento de Galicia e que permite “a convocatoria mediante concurso de méritos (é dicir, sen oposición) de prazas en propiedade en categorías como facultativo especialista de atención primaria, pediatría de atención primaria, as especialidades médicas nos hospitais comarcais ou as prazas sanitarias vinculadas ao Plan de Saúde Mental de Galicia”.
Trenor salientou que a dita lei “ampliou a experiencia exitosa do primeiro concurso de méritos convocado pola Xunta de Galicia en 2022, que logrou que máis dun cento de especialistas en medicina de familia tomasen posesión dunha praza fixa en centros de saúde que levaban tempo sen médico estábel”. Deles, engadiu, “dezaseis incorporáronse en centros da área de Santiago e Barbanza”.
