O Concello de Outes licitou varias actuacións correspondentes ao POS+2022 (Deputación da Coruña) coas que se pretenden acometer melloras en varios núcleos rurais, humanizacións na capital do Concello e mantemento de infraestruturas deportivas.
En canto ás melloras no rural, actuarase nas parroquias de Valadares, Entíns e Tarás. Ditas intervencións levaranse a cabo no lugar de Crespos, onde se reservan máis de 60.000 € para pavimentación de interiores, así como no camiño de Entíns a Fontenlos e nos interiores do lugar de Tarás.
Por outra banda, o Goberno dirixido por Manolo González dará continuidade este ano ao seu plan de humanizacións, farao nas principais rúas da capital do concello, acometéndose desta volta unha actuación de mellora da rúa Doutor Esperante (na imaxe), na que se invisten máis de 150.000 €.
No que se refire ás obras de mantemento de infraestruturas, entre as obras previstas tamén se atopa a mellora do Pavillón Deportivo da Serra de Outes, que precisa unha reforma da cuberta así como a posta en punto da contorna da pista deportiva. Finalmente, tamén se levará a cabo unha actuación nos piares da ponte sobre o río Tins en San Lourenzo, que se atopan en mal estado.
O alcalde, Manolo González, indicou que nas vindeiras semanas agárdase sacar a licitación o resto de actuacións do POS+2022, onde se inclúen pavimentacións nas parroquias de Outes, San Cosme, San Ourente, O Freixo e na Serra de Outes. O importe das mesmas ascenderá a uns 300.000 €.
