O Concello de Outes tennos deparadas para esta primeira semana de xaneiro unha serie de actividades de Nadal de gran interese. Por exemplo unha gran xornada festiva para recibir a visita das Súas Maxestades os Reis Magos de Oriente. Será o 5 de xaneiro deste ano 2023 dende a mañá. A axenda inclúe a recepción de Melchor, Baltasar e Gaspar no Pavillón Municipal da Serra en horario de 11.00 a 13.00 horas e de 15.00 a 18.00 horas. A saída da comitiva real está prevista para as 18.00, nas rúas da Serra. Ao remate do desfile, segundo informa a área municipal de Cultura, haberá unha chocolatada na praza de Galicia. Por certo que en caso de choiva suspenderase o desfile e o programa de actividades limitarase á recepción. As inscricións para as carrozas cómpre facelas a partir do luns 12 de decembro no teléfono 981 850 950 (a partir de 4 anos, até completar o aforo).
Dous días despois, o sábado, o Concello tamén organizará unha Festa de Inchábeis na Piscina Municipal de Outes, en horario de mañá e en dúas quendas (de 10 a 11.30h para menores de 8 anos e de 11.30 a 13.00 para as rapazas e rapaces de entre 9 e 15 anos).
A maiores, e a xeito de destacado colofón das celebracións, o Centro Social de Outes acolle o domingo 8 de xaneiro, a partir das 18.00 horas, un gran Baile de Reis. Actuará o grupo local Aires de Broña.
