A A conselleira do Mar, Rosa Quintana, visitou este martes 3 de xaneiro o porto de Muros, onde anunciou que o seu departamento, a través de Portos de Galicia, vai investir este ano arredor de 3 millóns de euros na renovación do alumeado de preto dunha trintena de portos autonómicos. “As actuacións”, dixo, “permitirán instalar novos equipamentos, luminarias e proxectores con tecnoloxía LED e software de telecontrol co obxectivo de mellorar a eficiencia enerxética e as condicións de iluminación das contornas portuarias reducindo o máximo posible a contaminación luminosa”.
Estes traballos, que en Muros contan cun orzamento de máis de 230.000 euros, realizaranse en tres portos da provincia de Lugo, (Ribadeo, Burela e Viveiro-Celeiro), en catorce da provincia da Coruña (Cariño, Cedeira, Sada, Malpica, Laxe, Fisterra, Cee, Muros, Portosín, Aguiño, Ribeira, A Pobra do Caramiñal, Cabo de Cruz e Rianxo) e nove da zona sur: Vilanova de Arousa, O Xufre-A Illa de Arousa, Tragove (Cambados), O Grove, Portonovo, Combarro, Bueu, Cangas e Moaña.
Quintana engadiu que se instalará tecnoloxía LED con equipamentos de altas prestacións “deseñados especialmente para traballar en espazos portuarios pola súa resistencia en ambientes mariños e condicións meteorolóxicas adversas”. Ademais, dixo, “incrementarase a protección fronte a posíbeis sobretensións e implantarase unha capa tecnolóxica para o telecontrol da iluminación”.
A titular de Mar destacou que a maiores está en tramitación un contrato global para as tres provincias litorais (e preto dunha trintena de localidades) de renovación de firmes e pavimentos nas contornas portuarias así como a sinalización horizontal en explanadas e vías portuarias por importe de 1,6 millóns de euros.
A estes investimentos, explicou, “engádese tamén a instalación de defensas e medios de amarre en distintas dársenas, un contrato que xa se está a executar por importe de máis de 1,8 millóns de euros e que ten como obxectivo mellorar as condicións de traballo dos profesionais do mar”.
No caso concreto de Muros, as actuacións para a mellora da iluminación contan cun orzamento de máis de 230.000 euros e permitirán renovar 175 luminarias e proxectores. Por certo que os traballos inclúen tamén a retirada dos equipamentos actuais. Amais de dotar o porto con tecnoloxía LED, dotarase de sistemas de telexestión.
Quintana tamén salientou que no caso da renovación de pavimentos e firmes, Muros contará cun investimento de arredor de 120.000 euros que permitirá mellorar o estado da explanada existente xunto á lonxa e pintar zonas de estacionamento.
A maiores, Rosa Quintana lembrou que “o peirao muradán tamén está incluído no contrato global de dotación de defensas e medios de amarre”, cun investimento de 75.000 euros, ao tempo “que se está a traballar no proxecto de reposición da cuberta e acondicionamento do edificio da lonxa e os departamentos de usuarios por importe de máis de 380.000 euros”.
As obras na lonxa inclúen a impermeabilización da cuberta plana así como a substitución das zonas a dúas augas e a reposición dos elementos de desaugue. Ademais colocarase un novo falso teito suspendido, faranse algúns cambios na sala de poxas, pintaranse distintos elementos e mellorarase o alumeado existente.
Deste xeito, vanse destinar nos próximos meses máis de 800.000 euros a distintas melloras no porto de Muros.
