O Centro Social de Boiro vai acoller este sábado 14 de xaneiro a presentación do libro Conversas comigo mesma & Emociones arrítmicas, da escritora pobrense (afincada en Boiro) Anxos Castro Parada. Será a partir das 20.00 horas. Acompañarán á autora María Outeiral, concelleira de Cultura, e máis Xulio Gutiérrez.
Editado polo selo madrileño Diversidad Literaria, é unha escolma poética de 160 páxinas, en galego e en castelán, na que a autora recolle pezas escritas ao longo de toda a súa traxectoria vital, dende a nenez. Nesta colección vital, Anxos Castro defende a poesía como “a forma máis máxica de comunicación de cantas existen”, que, asegura, “permíteme expresar co que máis me gusta, coa pluma, plasmando sobre o papel todas as miñas emocións”. O libro, explicaba nunha entrevista recente con La Voz, “contén toda a miña traxectoria literaria, desde que tiña 13 anos ata a actualidade, pois sempre fun gardando os poemas que xurdían de todo aquilo que me inspiraba ou me emocionaba”.
Logo da presentación en Boiro, Anxos presentará o libro na Pobra (3 de febreiro), en Rianxo (10 de marzo) e en Ribeira (24 de abril).
