A Deputación da Coruña organiza xunto a AGALURE unha actividade de divulgación e sensibilización para fomentar o uso responsábel, racional e seguro das novas ferramentas e produtos de lecer dixital. Trátase da xornada Videoxogos como adicción. Como detectar, tratar e previr a adicción os videoxogos, que se celebra este venres 20 de xaneiro na sala Juanjo Gallo da sede central do organismo provincial.
A actividade responde ao interese compartido polas entidades organizadoras a prol dun “uso racional das novas tecnoloxías e no perigo real do abuso nos videoxogos”. E engaden: “Cada ano aumentan os casos de menores que pasan moitas horas diante dunha pantalla polo que este tipo de accións deben servir para visibilizar o problema e poñer as ferramentas necesarias para previlo e abordalo”.
Ás 10.00 horas celebrarase a presentación das xornadas e o relatorio de Daniel Loren, gamer e experto en videoxogos, que expoñerá o relatorio Rumbo á adición e o estado actual da industria do videoxogo e a súa influencia no usuario.
Sobre ás 11.00 horas comezará o relatorio de Ana Estévez, profesora do departamento de Personalidade, Avaliación e Tratamento Psicológico da Universidade de Deusto, que explicará A fronteira entre o trastorno de azar e a adicción aos videoxogos. Tras unha pausa para o xantar, Ramón Peña, formador do Plan Director da Garda Civil de Lugo, comezará a súa exposición sobre a historia e prevención destas novas adiccións.
E finalmente, Antonio Rial Boubeta, doutor en Psicoloxía Social e profesor da área de Metodoloxía das Ciencias do Comportamento da USC, falará do Impacto das TRIC na adolescencia.
A Deputación da Coruña puxo en marcha iniciativas nos últimos anos, conxuntamente con AGALURE, para abordar as adiccións sen substancia coma a dos xogos de azar tratando de chegar directamente ao público obxectivo, á mocidade, a través de charlas en centros educativos e das canles de comunicación que máis empregan. “A adicción aos videoxogos afecta a menores na súa grande medida e o tempo de latencia para adquirir a dependencia é moi inferior que no pasado”, sinalan dende as dúas entidades.
