A sección sexta da Audiencia Provincial da Coruña, con sede en Santiago, en aplicación da nova lei, rebaixou de 11 anos a 10 anos e medio de cárcere a pena imposta a un condenado por abusar sexualmente, de forma continuada, da súa filla menor de idade. O tribunal explica no auto que na actualidade o marco punitivo da conduta do condenado é “lixeiramente máis beneficioso”, polo que acordou que procede a revisión da pena imposta.
Noutro auto, a sección sexta da Audiencia Provincial da Coruña rexeitou revisar a condena de cinco anos e medio de prisión imposta a un pai por abusar da súa filla menor de idade. Neste caso, segundo indican os maxistrados, “a nova regulación non resulta máis favorable, senón, ao contrario, a conduta estaría máis gravemente sancionada porque a pena prevista oscilaría entre os 7 e os 15 anos”, con arranxo ao artigo 180.1 do a nova lei, pois salientan que concorre a circunstancia 5ª, é dicir, que para a execución do delito, “a persoa responsable se prevalecese dunha situación de convivencia ou parentesco, por ser ascendente, ou irmán, por natureza ou adopción, ou afíns, ou dunha relación de superioridade coa vítima”. Ademais, a Audiencia destaca que no caso axuizado se trata dun delito continuado.
