Sanidade retira tres medicamentos (Isohes, o Volulyte e o Voluven) que podían causar a morte de certos enfermos


Novos medicamentos van ser completamente retirados do mercado e dos tratamentos. Así o anunciou a Axencia Española de Medicamentos e Produtos Sanitarios (AEMPS), dependente do ministerio de Sanidade. Será a partir do próximo 15 de decembro cando se verá suspendida a venda daqueles medicamentos que conteñen hidroxietil-amidón.

Esta substancia é un expansor plasmático para o tratamento da hipovolemia que pode causarse tras unha hemorraxia aguda, sendo administrado principalmente en pacientes que perderon sangue tras unha lesión ou unha cirurxía. Adoita utilizarse cando o tratamento con cristaloides non é suficiente.

A retirada farase en toda a Unión e son tres os medicamentos que a partir do día 15 terán prohibida a súa venda, o Isohes, o Volulyte e o Voluven. A AEMPS asegura, ademais, que aquelas existencias que sigan dispoñibles en centros sanitarios poderán devolverse aos laboratorios por medio das canles habituais, xa que desde o día anunciado non poderán utilizarse.

O Comité para a Avaliación de Riscos en Farmacovigilancia Europeo (PRAC), da Axencia Europea de Medicamentos, advertía a comezos de ano de que estes fármacos tiñan grandes riscos, desde danos renais ata a morte, nalgúns pacientes. Así, en maio a recomendación do PRAC foi aceptada pola Comisión Europea, que ordenou a retirada dos tres fármacos en todos os seus países membros.