En definitiva, seis persoas perderon a vida e outras dúas resultaron feridas a causa do accidente do autobús en Cerdedo-Cotobade.
Así, coa localización do oitavo membro da pasaxe, os equipos de emerxencias rematan unha intervención de longas horas e dunha complexidade extrema pola situación na que quedou o vehículo tras caer ao río por unha ponte na N-541, en Pedre.
Para o rescate dos corpos foron necesarios diversos medios e recursos, dependendo da súa situación. Deste xeito, interviñeron GEAS da Garda Civil e axentes especializados nos rescates de altura, e rescatadores do Servizo de Gardacostas de Galicia a bordo do Pesca II tras atoparse unha avaría no Pesca I.
Ademais, participaron Bombeiros do Deza, Bombeiros Pontevedra, GES da Estrada, Protección Civil de Cotobade, Grupo de Rescate en Altura e Acuático e GEAS da Garda Civil, Grupo de Apoio Loxístico da Axencia Galega de Emerxencias (AXEGA) cun Posto de Mando Avanzado, albergue e anfibio, Grupo de Intervención Psicolóxica en Catástrofes e Emerxencias (GIPCE) do Colexio de Psicólogos de Galicia, Urxencias Sanitarias de Galicia-061, Servizo Municipal de Protección Civil de Lalín e voluntarios de Protección Civil de Pontevedra.
Cómpre indicar que o 112 Galicia xestionou esta incidencia tras recibir as chamadas de alerta a pasada Noiteboa.
