CONGALSA, empresa de alimentación da Pobra do Caramiñal, felicitará as festas aos seus grupos de interese, un ano máis, coas postais gañadoras do seu tradicional Concurso de Postais do Nadal. A iniciativa, neste 2022, alcanzou a súa quinta edición e tivo como novidade máis significativa a implicación do persoal na elección das propostas premiadas.
O certame, que xurdiu nos seus comezos co obxectivo de premiar deseños realizados por nenas e nenos vinculados familiarmente a empregados da compañía, estableceu tamén nas súas dúas últimas edicións un premio para adultos.
A elección dos gañadores realizouse de maneira democrática, por parte de todo o persoal que quixo participar nunha votación levada a cabo a través de medios dixitais.
Nas bases do concurso establecíase liberdade no relativo á técnica utilizada no deseño das postais (debuxos con lapis, acuarelas, ceras, témperas ou rotuladores, entre outras posibilidades).
Luis Miguel Simarro, director xeneral de CONGALSA, foi o encargado de entregar os galardóns no transcurso dun breve acto desenvolvido nas instalacións da empresa. Nesta edición dos premios contouse con 22 traballos presentados a concurso.
Os premiados foron Diego Fernández, de 6 anos; Carla Fontao, de 8 anos, e Isabel Cabello, de 14 anos. A adulta gañadora foi Noemí Gil, directora do departamento TIC (Tecnoloxías da Información e a Comunicación) da empresa.
Recollida de xoguetes
Ademais de todo o devandito, en plena campaña do Nadal, CONGALSA organizou por terceiro ano consecutivo unha recollida solidaria de xoguetes entre os seus traballadores. Aquelas persoas interesadas en doar xoguetes poden deixalos nun contedor habilitado para tal fin nas dependencias exteriores da compañía, con sede principal no Polígono da Tomada (A Pobra).
