A área de Igualdade da Deputación da Coruña que xestiona María Muíño lanzou nas redes unha campaña para promover o dereito a gozarmos dunhas festas de Nadal en relación de igualdade. Fíxoo baixo a etiqueta #aunicaquimicaposible e reivindicando “o dereito a gozar sen medo, libres de submisións químicas e outras violencias de xénero”.
A campaña está deseñada para ser difundida en redes sociais, tanto nos perfís institucionais da Deputación como desde entidades e concellos da provincia (e que colaboran noutras compañas de Igualdade como DeFronte Contra a Violencia de Xénero). Tamén foi concibida para ser partillada por todas as persoas que desexen difundir a mensaxe de igualdade e consentimento mutuo nas relacións.
“Nunha época coma o Nadal, chea de festas e saídas nocturnas, é máis importante que nunca fomentar as relacións en igualdade e ocupar os espazos de lecer desde unha óptica de seguridade e diversión para todas as persoas” asegura María Muíño a respecto da idea que fundamenta esta acción.
Asi, xogando coa táboa periódica dos elementos químicos, a iniciativa reivindica “a única química posíbel nas relacións”, que non é outra que “a que está baseada na igualdade, o consentimento e a atracción mutua, e, en definitiva, no desexo entre as partes implicadas”.
A creatividade de #aunicaquimicaposible foi deseñada por Iria Otero e Marián Rodríguez da axencia As Peaky Branders e conta coa supervisión e asesoría en perspectiva de xénero de María Reimóndez.
