A Asociación Boirense de Empresarios (ABE) uniuse á campaña A Única Química Posíbel (#aunicaquimica posible) impulsada pola Área de Igualdade da Deputación da Coruña para fomentar un Nadal libre de agresións machistas. “Nunha época coma esta”, sinala a patronal boirense que dirixe Daniel García, “é importante concienciar e informar a cidadanía sobre o dereito a poder gozar dunhas festas libres de submisión química e de todo tipo de violencias, onde a igualdade, o consentimento e o desexo mutuo sexan a base de toda relación”.
Por este motivo dende a ABE sumáronse a campaña ao tempo que reivindican “que a única química posíbel nas relacións é a que está baseada na igualdade, o consentimento e a atracción mutua, e, en definitiva, no desexo entre as partes implicadas”.
E engaden: “A submisión química é a administración ou inxestión de alcol e/ou outras drogas que algunhas persoas empregan con fins delitivos; ademais abusar dunha persoa que está baixo os efectos da submisión química é un delito, mirar e non impedilo tamén o é”.
Dende a ABE recordan tamén que a submisión química pode darse de dúas formas: oportunista (cando a persoa consume de forma voluntaria alcohol e/ou drogas) ou premeditada (cando se lle administra á vítima unha sustancia para anular a súa vontade). “Nunha época coma o Nadal, chea de festas e saídas nocturnas, é máis importante que nunca fomentar as relacións en igualdade e ocupar os espazos de lecer desde unha óptica de seguridade e diversión para todas as persoas”, sinalan dende ABE, engadindo que “somos conscientes do problema e queremos aportar o noso gran de area trasladándolle aos nosos socios e ao público en xeral esta información”.
Esta iniciativa encádrase dentro das accións do plan da igualdade da Asociación Boirense de empresarios, entre as que destacan a utilización de linguaxe inclusiva en todas as comunicacións e publicacións, a colaboración con entidades que promoven a igualdade, a colaboración en actividades inclusivas e a participación na Mesa de Coordinación Institucional Fronte á Violencia de Xénero organizada polo Concello de Boiro e que vén de publicar recentemente un primeiro avance das súas conclusións.
A ABE tamén lembra que quen queira adherirse á campaña da Deputación pode facelo na web da entidade provincial.
