A actividade cultural da Pobra do Caramiñal prosegue en novembro coa vista posta no teatro, e faino co ciclo de representacións escénicas organizado pola Concellaría da Cultura, da cal é titular a edil Patricia Lojo (PSdeG-PSOE), en colaboración coa Rede Cultural da Deputación da Coruña. Redrum Teatro achegará a segunda función deste ciclo. A compañía subirá ás táboas do Elma no día 13, ás 19.00 horas.
Sinopse
A función Un home con lentes de pasta preséntanos a Sheyla, que vén de ser abandonada pola súa parella. Laura e Fer quérena animar para que aproveite a oportunidade e faga realidade os desexos que aparcara: escribir. Traerán a cear a Guillerme, o poeta capaz de namorar calquera cuns breves versos. Pero a el non lle van satisfacer as conversas banais nin os frívolos momentos de distensión. Sheyla, Laura e Fer son máis fráxiles do que cren; as súas vidas penden dun fío, afóganse na dúbida, algo que Guillerme non vai desaproveitar. A entrada é libre ata completar a cabida.
