O Bloque Nacionalista Galego de Ribeira celebrou onte unha emotiva homenaxe coa que agradeceu o traballo entregado realizado ao longo de tantos anos a cinco militantes históricos da formación nacionalista.
Xosé Vázquez Cobas, Dores Vidal Peón, Xosé Antón Parada, Vicente Paz Carou e Luís Pérez Barral foron as persoas ás se lles agradeceu o traballo desenvolvido ao longo dos últimos anos nos que ocuparon importantes responsabilidades a nivel local. A militancia da localidade fíxolle entrega dun obsequio a cada un deles: a Cobas por desenvolver un traballo constante como portavoz, a Antón pola súa entrega militante desde a fundación do BNG, a Dores por ser concelleira nuns momentos decisivos, a Vicente por ser responsábel local durante a última década e a Luís por tomar o relevo e facer un traballo incansábel polo ben de Ribeira. Houbo tamén unha lembranza a Xosé Alberte, responsábel local durante anos e falecido en 2014.
A deputada Rosana Pérez puxo en valor que estas cinco persoas levan anos de militancia nacionalista, nas que tiveron que afrontar situacións difíciles pero que “conseguiron deixar un Bloque máis forte, unido e capaz de liderar o vindeiro goberno de Ribeira”.
Pérez Fernández cre que o goberno local demostrou estar esgotado e goberna incluso contra os intereses da veciñanza ribeirense. “Fronte ese goberno sen ideas, estivo e está o BNG sempre a carón das loitas sociais como as da veciñanza de Palmeira en defensa da sanidade ou educación públicas, a carón dos veciños afectados pola circunvalación ou ao lado da veciñanza de Aguiño que pide maior participación nos proxectos que se fan na parroquia, por só citar algúns exemplos”.
O actual portavoz do BNG, Luís Pérez Barral, aproveitou o acto para agradecer todo o traballo feito pola militancia na localidade sen a cal, asegurou, “non tería sido posíbel chegar ao momento no que hoxe estamos, preparados para gobernar Ribeira defendendo os intereses da veciñanza por riba de todo”. Asemade, Pérez Barral, incidiu na idea de que “urxe mudar este goberno, porque está dilapidando millóns de euros en cemento mentres esquece as necesidades básicas da poboación”.
Fronte a parálise do goberno municipal con obras que non se acaban e que multiplican o seu custo, está un BNG centrado en facer propostas que resolven os problemas da xente de Ribeira. “Os bonos para o comercio, o trazado alternativo da circunvalación con menos custe social e ambiental, o proxecto de residencia pública ou o polígono industrial demandado polo Bloque desde 2009, son algúns exemplos da capacidade de traballo do BNG”.
