Amicos estrea este xoves, no Elma da Pobra, a súa miniserie sobre a problemática do lixo mariño

A asociación inclusiva Amicos estrea esta semana, na gran pantalla, a miniserie Ronsel de Arousa, unha produción de seis capítulos que ten o obxectivo de concienciar sobre a defensa de pesca e o marisqueo sustentábel na ría de Arousa. A estrea está fixada para este xoves 20 de outubro ás 17.30 horas no Teatro Cinema Elma da Pobra do Caramiñal. Foi gravada e editada polo estudo ribeirense Lesmes Producións, ao abeiro do proxecto Peneira, unha iniciativa financiada polo Grupo de Acción Local do Sector Pesqueiro da Ría de Arousa, GALP Ría de Pontevedra a través dá Consellería do Mar da Xunta de Galicia e o Fondo Social Europeo.

Javier Freijo é o protagonista da trama, que xunto co actor Federico Pérez, o seu irmán na ficción, ven de preto a problemática do lixo mariño un día que están a pescar e deciden loitar para poñerlle freo. Falan con mariscadores, biólogos, vendedores en lonxas, levan a cabo accións formativas… todo iso en diferentes localizacións en ambas beiras da ría de Arousa e acompañados de compañeiros e amigos.

A estrea será como dixemos este xoves día 20 de outubro ás 17:30 no Teatro Cinema Elma do Concello da Pobra do Caramiñal,. O acto estará capitaneado polo actor protagonista, acompañado dos seus compañeiros e o actor Federico Pérez.

Durante o transcurso do evento contarase tamén coa actuación do cantautor Manoele de Felisa, que amenizará o evento con cancións de temática mariñeira.

A partir da vindeira semana, a asociación da nosa comarca Amicos estreará os capítulos da szerie con periodicidade semanal nas súas redes sociais.

“Gustaríanos que a poboación local nos acompañase nun día tan especial para nós e para os protagonistas da miniserie”, sinalan dende Amicos.

A entrada será de balde.

Proxecto Peneira

O Proxecto Peneira de axentes de promoción e defensa da pesca e o marisqueo sustentábel na ría de Arousa é un proxecto de 14 meses de duración impulsado por Amicos e que esta liderado por persoas con discapacidade en colaboración coas confrarías, colexios e establecementos de venda dos produtos do mar.

Peneira tirará proveito da ciencia cidadá para reforzar a colaboración entre os sectores pesqueiros e máis estreitamente ligados ao mar, a poboación local e visitantes da ría de Arousa e sentará as bases dun modelo de desenvolvemento endóxeno inclusivo baseado na conservación do entorno litoral e mariño. Aplicando “unha perspectiva de ecoloxía social que vincule o estado de saúde do medio mariño e os hábitats litorais coa calidade de vida da poboación”, Peneira buscará maximizar o seu impacto sobre o medio mariño.

Ademais, o proxecto quere dar voz e apoderar ás persoas con discapacidade cun dobre obxectivo: por un lado, para a promoción de valores como a conservación dos espazos mariños e a sustentabilidade e, por outro, para a visibilización das competencias das persoas con discapacidade intelectual, non só na adquisición de coñecemento senón tamén na súa transmisión como axentes de cambio social.