A Pobra aumenta o servizo de conciliación ás tardes

A Concellaría da Igualdade da Pobra do Caramiñal dá un paso máis en materia de igualdade
proporcionando conciliación nas tardes. O Espazo de Coidados Corresponsables trátase dun servizo municipal de balde e aberto a tódalas familias da Pobra que o requiran ao abeiro do Plan Corresponsables promovido polo Ministerio da Igualdade.
Xunto coa asesora xurídica á muller, María Pérez, e a axente de igualdade do Concello, Carolina Rodríguez, a concelleira da Igualdade, Charo Varela (Nós Pobra), explica que se trata dun “paso importantísimo” para facilita-la vida laboral e persoal de mulleres e homes ao tempo que se fomenta a correponsabilidade. O obxectivo é, polo tanto, “que tódalas familias da Pobra teñan un apoio no Concello para a atención dos seus pequenos”, remarca a edil.
Deste xeito, o municipio conta cun servizo de conciliación de luns a venres, pola mañá e pola tarde, ademais de nas fins de semana coa Pequetroula.
A dita iniciativa comezará a funcionar a partir da próxima semana, de luns a venres, en horario de 16.45 a 20.45 horas, nas instalacións do CEP Salustiano Rey Eiras. Durante este tempo, a rapazada con idades comprendidas entre os 3 e 12 anos asistirá a obradoiros de lectura, labores manuais ou xogos cooperativos, entre outras propostas, todas elas con perspectiva de xénero.
Nos vindeiros días entregaráselle ao alumnado dos centros educativos un díptico informativo que xa leva incorporada a folla de matrícula; documento que se deberá entregar cuberto no Departamento da Igualdade do Concello ou ás monitoras do Servizo de Madruga e Comedor.

Ofértase un total de 60 prazas. Se a demanda supera esta cifra, daráselles prioridade ás familias cun menor nivel de renda e terán carácter prioritario aquelas coas seguintes circunstancias: vítimas de violencia de xénero en tódalas súas manifestacións; monoparentais; aquelas en que ámbalas dúas proxenitoras ou ámbolos dous proxenitores traballen; mulleres en situación de desemprego para realizar accións formativas e busca activa de emprego; coidado de persoas dependentes; e mulleres maiores de 45 anos.
As persoas interesadas poden solicitar máis información no enderezo electrónico igualdade@apobra.gal ou no teléfono de contacto 981832764, marcando a extensión 6.