Outes empodera tecnoloxicamente ás mulleres do concello para mellorar a súa empregabilidade

O CIM (Centro de Información á Muller) de Outes organiza este outono un curso para mulleres desempregadas que porá o foco na súa capacitación tecnolóxica e no seu adestramento de cara aos procesos de procura laboral e entrevistas de traballo. Celebrarase entre o 17 e o 19 de outubro. Aquelas mulleres interesadas en participar deberán anotarse chamando ao teléfono do CIM (981 850 949) ou no enderezo electrónico cim@outes.gal, antes do 7 de outubro.

O curso, encadrado no programa de formación para o empoderamento feminino Dana+ da entidade estatal Fundación Mujeres, achegará ás asistentes á situación actual do mercado de traballo e mostraralles como pór en valor as súas habilidades e competencias á hora de buscar un emprego. Tamén se lles adestrará nas mellores técnicas e tecnoloxía a empregar e no emprego da Internet. O obradoiro levarase a cabo no Centro de Emprendemento de Outes (A Capela). Está destinada a mulleres de entre 18 e 65 anos.

A actividade está organizada pola Fundación Mujeres, o Concello e o CIM municipal.