Frinsa gana máis de 34 millóns pese á freada de vendas

Frinsa, a conserveira de Ribeira especialista en abastecer a marca branca dos grandes grupos de distribución, retrocede en ingresos, pero non en beneficios. A compañía pechou o pasado exercicio con 546 millóns de cifra de negocio, unha caída de 42 millóns respecto ao ano do Covid. O recorte nas vendas relega ao grupo á terceira posición entre as grandes conserveiras galegas, xa que Calvo, á que superara por primeira vez en 2020, alcanzou os 555 millóns de ingresos, segundo difundiu nun comunicado.
Os beneficios alcanzaron os 34,1 millóns en 2021, superando os 33 millóns do exercicio anterior. Equivalen a oito veces as ganancias de Jealsa, que o ano pasado viu trastornada a súa actividade polo incendio na súa planta de Boiro. O resultado de explotación de Frinsa creceu ata os 45,8 millóns e o ebitda superou os 58 millóns.
Este balance permitiu ao grupo repartir 22 millóns en dividendos, a mesma contía que a cargo do exercicio anterior. En xaneiro aprobou un pago de 2 millóns, mentres que en xuño e en setembro acordou outros dous dividendos de 10 millóns cada un. A compañía está controlada polo fundador, Ramiro Carregal, co 64,10% do capital, mentres que o seu fillo, Jorge Carregal Varela, é titular do 35,9% restante.

Provedora de Lidl, Carrefour ou DIA, a conserveira de Ribeira explica no seu Estado de Información non Financeira que é o sétimo maior comprador de atún do mundo ao procesar máis de 580 millóns de latas comercializadas. Aínda que o seu principal negocio é nutrir a marca de distribución de grandes grupos, tamén comercializa marca propia, Frinsa, Ribeira, Seaside e The Nice Fishermn, e desprega unha ducia de tendas de conservas gourmet baixo a marca da Conserveira.