Os actos reivindicativos da figura e do legado de Victoriano García Martí, un dos grandes referentes xornalísticos, literarios e culturais da Pobra (de onde era natural e tiña residencia) e da nosa comarca, seguen activos este verán. García Martí, fillo predilecto da vila do Caramiñal, protagonizará un roteiro teatralizado pola Pobra. Esta actividade pechará os actos de homenaxe ao escritor e xornalista promovidos pola Asociación de Periodistas de Santiago en colaboración co Concello.
As, novamente co apoio da Administración local pobrense e de diversas entidades coma o Ateneo de Santiago, organízase para o 27 de agosto un roteiro teatralizado por lugares do núcleo urbano do municipio vinculados á súa traxectoria vital e profesional, que se efectuará tras unha recepción institucional ás persoas asociadas á sociedade xornalística.
A concelleira da Cultura, Patricia Lojo (PSdeG-PSOE), xunto co presidente da referida institución xornalística, Luis Menéndez, e a técnica do Museo Valle-Inclán pobrense, Araceli Abad, explicaron que o percorrido partirá dende o Consistorio, ás 12.30 horas, da man do actor Roberto Leal. Estará aberto a todo o público, sen necesidade de inscribirse con antelación.
Para facilitar o acceso da cidadanía compostelá a esta cita, a referida asociación pon a disposición un autobús que unirá ámbolos concellos. Será preciso poñerse en contacto no teléfono 689686924.
A edil quixo agradecer este tipo de iniciativas que “contribúen a mostrar, reivindicar e divulgar a figura e o legado dunha persoa que tanto aportou ao mundo da cultura dende diversas vertentes”. Puxo tamén de manifesto a amizade existente entre o xornalista e outro dos grandes referentes intelectuais da localidade: Valle-Inclán.
Doutra banda, Luis Menéndez relatou que, previamente ao acto de homenaxe que transcorrerá a finais de agosto, realizáronse outros dous: a descuberta dunha placa conmemorativa na casa onde residiu en Santiago de Compostela, así como unha conferencia no Ateneo de Madrid, do que foi directivo, a cargo da profesora Arantxa Fuentes, especializada na vida e obra de García Martí. Neste senso, enxalzou a “calidade académica fóra de serie” de Victoriano; unha figura de alta relevancia intelectual que destacou como filósofo, ensaísta, avogado, escritor e prolífico xornalista, recibindo numerosos recoñecementos alén de Galicia, nomeadamente en París e Madrid. Nesta última cidade foi directivo do Ateneo nos tempos de Menéndez Pidal, Conde de Romanones, Azaña e Valle-Inclán. Indicou tamén que foi editor das Obras completas de Rosalía de Castro e autor de numerosos traballos xornalísticos en diarios de España, Francia e Hispanoamérica, ademais de promover o primeiro Congreso de Xornalistas de Galicia celebrado en Santiago, en 1921, e ser discípulo do filósofo francés Henri Bergson.
