Os servizos sanitarios trataron de reanimar ao traballador no punto, sen éxito.
Os Bombeiros de Santiago acudiran ao lugar da Cacharela, na parroquia compostelá de San Martiño de Aríns, alertados polo 112 Galicia dun lume que se orixinara nun autobús de liña urbana sen pasaxeiros. O condutor estaba tratando de apagar o incendio, que comezaba a descontrolarse.
Os servizos de emerxencias que traballaban no punto informan de que o autobús, que aínda seguía en chamas nese momento, precipitouse cara o camión de bombeiros, deixando ao finalmente falecido entre os dous vehículos.
Dende o 112 deuse aviso a Urxencias Sanitarias de Galicia-061. Namentres, os compañeiros sacárano, ferido de gravidade, e tentaron reanimalo. Outros traballadores seguían tratando de apagar as lapas que aínda quedaban acesas.
Participaron no operativo, ademais dos servizos sanitarios e os Bombeiros, a Policía Local e Protección Civil de Santiago.
Comunicado do Concello de Santiago:
Ás 8.00 h da mañá de hoxe, martes 30 de agosto, o parque de Bombeiros recibe aviso por mor dun incendio nun autobús da empresa Rías Baixas, que presta servizo para o Concello, na parroquia de Aríns, lugar da Cacharela, e que nese momento se atopaba baleiro.
Ás 8.20 h os bombeiros chegan ao lugar e cando están montando o operativo para proceder a apagar o incendio, de forma sorpresiva, o autobús desprázase e atropela a un bombeiro en prácticas que estaba de observador, sen intervir no dispositivo.
A pesar da rápida intervención dos servizos sanitarios non foi posible a súa reanimación.
O Concello de Santiago lamenta profundamente este tráxico suceso e únese á dor da familia, dos seus compañeiros e amigos
