Logo de doce meses de andaina formativa un total de 12 mozos e mozas pertencentes aos municipios de Ribeira e Porto do Son remataron este 10 de agosto, oficialmente, o Obradoiro de Emprego Serra do Barbanza. O acto de clausura e a entrega de diplomas celebráronse no Centro Cultural Lustres Rivas, que contou coa participación da conselleira de Promoción do Emprego e Igualdade, María Jesús Lorenzana; do alcalde de Ribeira Manuel Ruiz e da primeira tenente de alcalde de Porto do Son, María Maneiro.
Tanto Manuel Ruiz como María Maneiro destacaron a alianza que están a vivir ambos municipios, con oito obradoiros de emprego xa desenvolvidos en común: os sete de Tahúme (xa está confirmada unha oitava edición) e o deste Serra do Barbanza que estivo especializado en pavimentado e albanelería de urbanización. Tamén agradeceron a colaboración da Xunta e desexaron ao alumnado unha rápida inserción laboral nun sector, o da construción, “que está demandando moito persoal cualificado”, sinalaron.
Tamén a conselleira María Jesús Lorenzana salientou “a oportunidade que supuxo o obradoiro para formarse nun sector que agora está entre os que máis traballadores demanda na comunidade autónoma” e lembrou que a construción, que representa un 6,5% do PIB en Galicia, veu aumentadas as afiliacións á seguridade social nun 3,9% nun durante o primeiro trimestre do 2022. Ademais, aludiu á colaboración existente entre dous concellos veciños como son Porto do Son e Ribeira e deu os parabéns aos asistentes a Serra do Barbanza por ter chegado ao final da súa formación.
Cómpre informar de que entre os labores levados a cabo no noso municipio figurou a construción de beirarrúas na contorna do colexio Pé do Corniño, na parroquia de Carreira.