Non houbo tregua esta noite, nin para o amplo dispositivo de profesionais que combateron o lume durante a noite, nin para as persoas que residen nas proximidades das lapas que avanzaron sen control dende Cures, Boiro (o xoves a primeira hora da tarde), até A Pobra e Ribeira (Oleiros). O forte nordés foi coma todos os anos un fatal aliado para un incendio que, segundo as últimas actualizacións da Consellería de Medio Rural, xa arrasou 1.200 hectáreas de monte arborado e baixo.
Á espera de que se manteña este respiro do vento en calma (e de que vire un algo a oeste pola tarde), o parte de desfeitas semella abondo negativo: amais da dita superficie de monte destruído, foron rexistrados grandes danos no Camping Ría de Arousa (que tivo que ser desaloxado) de Oleiros e en vivendas deste núcleo ribeirense. Tamén en varios establecementos hostaleiros da Pobra. As persoas desaloxadas tiveron que pasar a noite nos pavillóns de A Fieiteira e Palmeira, uns 250 veciños de Ribeira. Amais, unha ducia de persoas da Pobra foron acubilladas na Tomada, auxiliados e atendidos por voluntarios locais da Cruz Vermella.
Os intres de meirande preocupación producíronse entre as 21.00 horas e as 3.00 da madrugada pasada, cando se produciu o desaloxo do Camping Ría de Arousa e da contorna de Balteiro (Oleiros), pola proximidade das lapas.
No lado positivo, sinalar que non foi necesario evacuar o Hospital do Barbanza, xa que o lume non entrou no bosque que o rodea. Outra nota positiva é o acougo experimentado polo forte vento do nordés que imperou estes días e que fixo que o lume fose absolutamente incontrolábel, malia o traballo por terra e por aire, cunha ducia de avións guindando auga na fronte do incendio. De feito, no parte do tempo de Meteogalicia prognostícase a entrada de néboas ao longo desta tarde e sobre todo deste domingo, feito que contribuirá a sufocar o que xa é o peor lume da tempada en Barbanza dende o de Dodro -Rianxo de hai varios anos.
No lume destes días, aínda activo, traballaron arreo, día e noite, servizos municipais de emerxencias, Protección Civil, policías locais, Garda Civil e bombeiros, complementado os recursos de Medio Rural: tres técnicos, 45 axentes forestais, 87 brigadas, 40 motobombas, catro pas, unha unidade técnica de apoio, 12 avións e nove helicópteros, aos que se sumou na última hora deste venres a Unidade Militar de Emerxencias (UME).
