En Outes, a piques de rematar os traballos para a mellora enerxética de exteriores

O Concello de Outes informou de que xa están na súa recta final os traballos para rematar a obra de mellora enerxética de diversas alumeados exteriores no termo municipal. Esta iniciativa ten a súa orixe en decembro de 2019, cando o IDAE (Instituto para a Diversificación e Aforro de Enerxía) concedeu ao Concello unha subvención para financiar con fondos europeos o 80% do proxecto de aforro enerxético nos alumeados públicos, un proxecto que ascende a 846.516,30 €.

“Nos últimos meses”, informaron fontes do Consistorio, “puideron verse os avances da obra que está a piques de rematar, na que o montante principal corresponde á substitución da maior parte das luminarias do alumeado público do concello por luces LED, a modernización de cadros eléctricos de alumeado público, así como a substitución das luminarias dos paseos de Pontenafonso e Broña”.