Outes instala luminarias sustentábeis en Ponte Nafonso e mellora a estética das torres da Horta do Muíño

O Concello de Outes vén de compartir nas redes sociais o resultado de dúas intervencións realizadas para mellorar a sustentabilidade, a estética e o impacto visual de varios equipamentos. Unha destas intervencións realizouse no paseo de Ponte Nafonso, onde o Concello habilitou luminarias novas grazas ao proxecto municipal de aforro enerxético. A través deste proxecto substitúense os farois anteriores, de maior consumo, por un número moi inferior das novas, co que “o aforro é significativamente maior”.

Amais, co obxectivo de paliar o impacto paisaxístico creado polas torres de media tensión situadas na Horta do Muíño, levouse a cabo unha intervención artística para mellorar a súa integración no medio. Os traballos foron desenvolvidos por Ali Vava.