O Concello de Boiro executa estes días a creación dun paseo que una o existente no río Breiro co núcleo da Boliña. O alcalde, José Ramón Romero, e o concelleiro de Urbanismo e Obras, Luis Ruiz, visitaron na mañá deste 12 de xullo o lugar onde se están a desenvolver os traballos devanditos.
Con esta actuación pretendese conectar o núcleo rural da Boliña co paseo do rio Breiro materializado en 2018 e poder facer un percorrido peonil accesíbel ata a praia de Barraña. Trátase dun paseo de 150 metros de lonxitude e 3 de ancho de chan de area-cemento que se completa cunha pasarela peonil de 30 metros de lonxitude de madeira e plástico reciclado para salvar o desnivel existente ata a estrada.
A obra, dun importe de 25.514,55 euros, forma parte dun proxecto para a reparación e mellora de beirarrúas e pavimentos que conta co financiamento da Deputación da Coruña a través do Plan Único (POS+).
