Este sábado 9 de xullo celebrarase na Horta do Muíño (Outes) a xeira de fin de curso que estaba prevista para o 25 de xuño e que tivo que ser adiada a unha nova data por mor da chuvia. Será unha xornada festiva para toda a familia, cun xantar de campo e con actividades de maxia, música e teatro, entre outras propostas.
O programa inclúe un espectáculo do Mago Paco ás 12.30 horas e logo do xantar (previsto a partir das 14.00 horas), unha función da compañía Al Grano (presentando o seu espectáculo Kaldi, da man de Pistacatro, a partir das 17.00 horas) e un concerto con Pitusa Semifusa (Olga Brañas) a partir das 19.00 horas. A axenda complementarase cunha exposición didáctica de insectos a cargo de Mundobichos.es. Organiza o Concello de Outes.
