Seso Durán presenta o 18 de xuño no Teatro Colón o seu disco “O son da memoria”

A Deputación da Coruña informou de que o seu departamento de Cultura retoma a programación m musical este 18 de xuño no Teatro Colón, onde Seso Durán presentará, ás 20 horas, o seu disco O son da memoria. O músico marinense estará acompañado, como artistas convidados, por Carmen Rey (voz), Ángeles Dorrio (voz), Javier Cedrón (violín), Antonio Domínguez (voz), Félix Cons (voz) e Suso Iglesias (acordeón); e pola súa banda, formada por Alex Carrero (baixo), Lucas Fernández e Irra Chouza (guitarras), Cibrán Rey (batería), Xabier Vieitez (teclados) e Sabela Cereijo e Sandra Lima (coros).

O son da memoria é un disco de rock folk escrito arredor do que aconteceu tras o golpe de xullo de 1936. Centrado nas vítimas, nos verdugos, nos lugares, no cable eléctrico que conecta pasado e presente, o disco aposta por recuperar a memoria ten un marcado acento de denuncia. A canción Príncipe azul, por exemplo, está baseada nun discurso en Radio Sevilla, no que o xeneral golpista Queipo de Llano anima os lexionarios e regulares a violar as milicianas republicanas. “O emprego da agresión sexual ás mulleres como arma de guerra é algo tristemente habitual nos conflitos bélicos”, explica Durán. “O feito de que un dirixente tan destacado o faga expreso publicamente non é só unha mostra de brutalidade, senón tamén a clara expresión dun sentimento de impunidade que o tempo non fixo máis que confirmar”.

A entrada é de balde e os convites xa se poden retirar na web do teatro.