O voluntariado ambiental convocado polo Concello da Pobra do Caramiñal esta fin de semana para efectuar unha limpeza na praia da Corna conseguir retirar 186 quilogramos de lixo. A actividade realizouse o domingo pola mañá, día 5, con motivo do Día Mundial do Medio Ambiente. O equipo mobilizado apañou refugallos manualmente con materiais proporcionados polo Concello da Pobra do Caramiñal.
Esta limpeza de residuos foi posta en marcha para “concienciar sobre a importancia de preservar as contornas naturais e involucrar a veciñanza no coidado delas”. Dende as concellarías do Medio Ambiente e do Voluntariado, das cales son titulares a edil Genoveva Hermo (Nós Pobra) e o edil José Andrés Lojo (Nós Pobra), respectivamente, trasladaron o seu agradecemento ás persoas que participaron na iniciativa.
A actividade formou parte da campaña pobrense Agora é o momento!, estruturado en distintos terreos do voluntariado: social, medioambiental, cultural e de benestar animal. Cómpre lembrar que todas aquelas persoas interesadas en achegar a súa colaboración poden contactar a través do teléfono 981832764 -opción 1-, do enderezo electrónico voluntariadopobradocaraminal@gmail.com ou por un escrito presentado no rexistro municipal.
