O Grupo Municipal Infantil de Teatro de Ribeira vai representar este venres 3 de xuño, no Auditorio Municipal, unha función que levará por título Que me vas contar, obra orixinal de Segundo Durán “Chiki” que foi presentada este primeiro de xuño en rolda de prensa pola concelleira de Cultura, María Sampedro, e o director do citado grupo, Óscar Romero.
A actividade, que forma parte da programación do Xuño da Cultura e as Artes (axenda que arranca este mércores 1 de xuño), suporá tamén a clausura da escola infantil municipal de teatro no presente curso, polo que ao remate da función os dezasete nenos e nenas que a integran tamén recibirán os seus agasallos e diplomas.
Maria Sampedro explicou que este mesmo acto servirá como homenaxe póstuma a Daniel Gómez Ramil, “un dos principais impulsores do teatro infantil escolar na nosa cidade e ao que recentemente tamén recoñecemos nomeando á Mostra de Teatro Infantil de Ribeira co seu nome”.
Segundo explicou Óscar Romero, co-director da función xunto co seu autor Chiki Durán, Que me vas contar pretende ser “unha reflexión sobre o mal uso da linguaxe nas redes sociais a través dun xuízo”. Tamén saudou o feito de poder levala a escena despois de dous anos de pandemia, agardando o momento de recuperar tamén a Mostra de Teatro Infantil.
A entrada será de balde ata encher aforo.
