Alumnado do IES Leliadoura somérxese no mundo do marisqueo na Pobra

O litoral da Pobra acolleu este luns 13 de xuño un obradoiro de marisqueo no que participaron corenta alumnas e alumnos de primeiro da ESO do IES Leliadoura de Ribeira. A actividade abeirouse ao programa de visitas formativas e divulgativas organizadas dende o Concello e a disposición de centros educativos de toda Galicia.

A estadía na Pobra do Caramiñal dos estudantes de Ribeira tivo como punto de partida o auditorio do Museo Valle-Inclán, onde unha das técnicas do Turismo do Concello ofreceulles unha explicación do cometido da actividade e onde asistiron á proxección dun vídeo que amosa a cadea pola que pasan os recursos marisqueiros. Trala entrega dos receitarios que aglutinan as elaboracións que se fan con bivalvos nos establecementos hostaleiros da localidade, desprazáronse ata a praia dos Areos para coñecer in situ o proceso extractivo da man das mariscadoras.

Mediante estas visitas-experiencia, a Concellaría do Turismo que dirixe Charo Varela (Nós Pobra), coa colaboración da Asociación Mar da Pobra, busca achegar ás xeracións máis novas o oficio das mariscadoras e fomentar entre elas o respecto polo mar, polo traballo neste eido e polo medio natural, ao tempo que se contribúe con esta acción á desestacionalización da demanda turística.