O Concello da Pobra informou do inicio, a pasada semana, dunha nova campaña de control da velocidade nas vías urbanas e rurais. A iniciativa, impulsada dende o Consistorio,, estenderase até finais do presente mes.
Os controis son levados a cabo por parte do corpo policial pobrense en puntos de maior risco e contando para ese cometido cun vehículo radar cedido temporalmente pola Dirección Xeral de Tráfico (DXT).
A este respecto, o concelleiro da Seguridade, José Andrés Lojo (Nós Pobra), fai fincapé en que non se poñen en marcha este tipo de accións “cun afán recadatorio”, senón “como medida disuasoria do exceso da velocidade ao tempo que se insiste na obrigatoriedade de cumprir a normativa en materia de circulación para así reducir a sinistralidade”.
