“Recuperar Galicia tamén no mar”. Antón Luaces

Debatida o martes e votada este mércores após máis de 500 anos “de intentos de castelanización da sociedade e a onomástica, antroponimia. hidronimia e toponimia”, o Congreso dos Deputados, coa excepción de Vox e Ciudadanos, aprobou a tramitación da proposición de lei que formula a modificación da lexislación en vigor para que se respecte a toponimia oficial na cartografía das capitanías e os distritos marítimos de Galicia.

Na defensa da modificación da lei de Portos do Estado e a Mariña Mercante, o deputado do BNG, Néstor Rego, lembrou que os galegos recuperamos oficialmente en 1983 a toponimia propia coa Lei de Normalización Lingüística de Galicia, aludindo ao feito de que o debate desta proposición cadrara agora coa celebración do Día das Letras Galegas. Salientou na súa intervención o deputado nacionalista galego, o apoio á normalización que supuxo “a mobilización en Santiago de Compostela convocada pola plataforma “Queremos galego”, lembrando que, malia todo, a normativa legal de aplicación que regula as capitanías marítimas  e os distritos marítimos é empregada a día de hoxe con toponimia deturpada, o que afecta mesmo á matriculación das embarcacións en provincias marítimas como a de Vilagarcía.

Néstor Rego calificou de “vergoña” o feito de ter que levar ao Congreso o debate deste asunto, polo que reclamou o cumprimento da lei por parte da Administración do Estado.

A normativa establece que os topónimos “terán como única forma oficial a propia, a galega”, polo que a Administración “debe respectala”.

Citou neste caso o deputado do BNG topónimos que se manteñen en uso sen que este decaia, como El Ferrol, Santa Eugenia de Ribeira, Isla de la Toja, Isla Quiebra (por illa da Creba) e lembrou que non vai moitas semanas, nun foro celebrado na illa da Toxa -con participación do Rei e a do presidente do Goberno- empecináronse os asistentes e mesmo os convocantes do encontro en empregar o nome Isla de La Toja.