O BNG de Outes, a través dos seus representantes María Xosé Suárez e Anxo Núñez Fernández, presentaron unha proposta sobre a problemática da vivenda no termo municipal, poñendo o foco nunha serie de cuestións que son comúns a boa parte dos nosos concellos: cuestións como a perda de poboación motivada pola falta de oportunidades (e que repercute nunha degradación dos servizos) ou a existencia de moitas casas tradicionais baleiras (cada vez máis) e de edificacións novas que nunca foron rematadas nin ocupadas por compradores.
Estes e outros datos aparecen debullados nun vídeo compartido pola agrupación dende a ribeira do Freixo, que é, segundo sinalan, un exemplo deste “proceso de perda de vivenda” e destas “eivas locais en materia de bolsas”. Neste senso, o BNG denuncia “a falta de implicación das administracións local e autonómica” para reter xente nova no concello. Anxo Núñez tamén destaca o feito de que Outes sexa o concello máis envellecido da ría e o que máis sofre a perda de poboación. Por estas e outras razóns, reclaman dúas medidas urxente: unha bolsa de vivenda local e a creación de axudas que porían a disposición da xente inmóbeis pechados.
