A Deputación da Coruña compartiu finalmente o palmarés do XIII Premo Rosalía de Castro, constituído pola escritora Maria Canosa, na categoría de persoas; a Asociación de Escritores-as en Lingua Galega (AELG), na categoría de entidades; e o proxecto Brazolinda, para iniciativas de dinamización para a poboación de menor idade. O certame quixo recoñecer novamente “o labor na promoción e dignificación social do patrimonio lingüístico de Galiza, tanto no ámbito da provincia como a nivel galego”.
O xurado formárono María Muíño, delegada especial de políticas de igualdade e normalización lingüística da Deputación; Alexandre Marín, técnico de normalización lingüística do Concello de Culleredo; e os representantes de dous dos gañadores do certame en 2021, Carmen Denébola Álvarez, presidenta da Agrupación Astronómica Coruñesa Ío, e Carlos García, de Twitter en galego. María Muíño presidiu o xurado, no que actuou como secretaria Dores Sánchez, técnica de normalización lingüística da institución provincial.
Á hora de outorgar o galardón a María Canosa, o xurado tivo en conta o “seu compromiso firme coa lingua galega e longa traxectoria, que se reflicte nos premios recibidos e no recoñecemento e impacto social en múltiples ámbitos: escritora, divulgadora etc.”.
Da AELG salientou “a súa longa traxectoria, con máis de corenta anos, de compromiso co sector literario galego nos seus diferentes xéneros (poesía, teatro, narrativa, ensaio, escrita científica, traducións… ), fomentando o uso e a defensa pública da lingua”.
E do proxecto Brazolinda, o xurado salientou o “non só ter como persoas destinatarias a nenez e o impulso das relacións interxeracionais en lingua galega, senón o fomento da normalización lingüística nos xogos de mesa, un espazo mo que o galego non ten moita presenza ata o momento”.
Cada un dos gañadores recibirá un premio en metálico de 5.000 euros.
