A Casa do Concello de Ribeira exhibe estes días unha nova exposición, a mostra Paso a paso, integrada por un total de 24 imaxes tomadas por oito autores, todos eles alumnos da escola de fotografía que dirixe o prestixioso profesional Fuco Reyes.
O acto inaugural, presidido este luns 9 de maio polo alcalde Manuel Ruiz e coa presenza e intervención tamén da concelleira de Cultura María Sampedro, contou coa presenza de catro dos autores participantes: Ana Rozas, Adonis Ríos, Josina Gancedo e Ramiro González (os outros catro son Esmeralda López, Ánxela Taboada, María Pino e Maite Miñambres).
Paso a paso é unha mostra itinerante que inicio o seu percorrido no pasado febreiro en Valga, pasando pola Illa de Arousa e Vedra. Logo de recalar en Ribeira marchará a outros concellos como Cambados, Soutomaior, Ordes e Ames para finalizar a súa peregrinaxe en Santiago no remate do ano.
Tal e como se explicou no percorrido posterior á intervención dos participantes, a exposición vertébrase en tres temáticas de traballo: unha documental (coas obras de Anxela Taboada Lamela e Adonis Ríos, que representan a alma de Galicia), outra emocional (é a que propoñen Ramiro González González, Josina Gancedo Cons e Esmeralda L. Castro máis humanista, ao poñer énfases nas vivencias de cada ser humano) e outra de corte poética (con Maria Pino, Maite Miñambres e Ana Rozas Vázquez en canto ás relacións da fotografía e a pintura, que introduce ao visitante nun universo de fantasía e recordo, desde a cotidianeidade, a atemporalidade e a maxia).
Manuel Ruiz como María Sampedro agradeceron aos protagonistas da mostra que escolleran o concello ribeirense como etapa no seu percorrido e convidaron á cidadanía a achegarse ao consistorio local para recrearse nas obras que a compoñen. Paso a paso ficará ata o vindeiro 15 de xuño.
