O Auditorio do Museo Valle-Inclán da Pobra do Caramiñal vai dar acollida a unha actividade literaria, este 8 de maio ás 20.00 horas. Trátase da presentación do libro Irmandiñas, da ensaísta e historiadora galega Aurora Marco (Noguera de Albarracín, 1948) e coa edición a cargo de Laiovento.
O acto contará coas intervencións da propia autora e do concelleiro da Memoria Histórica, Xabier Santos (BNG), ademais do acompañamento musical por parte de Barahúnda.
Segundo informan dende o Concello da Pobra, este ensaio é “unha reivindicación do labor social, cultural e político desenvolvido polas mulleres galegas nas primeiras décadas do século XX”, etapa en que, malia a súa incorporación aos espazos públicos, a súa proxección foi limitada e as irmandiñas non foron unha excepción. A través dun arduo traballo de investigación, Aurora Marco constata documentalmente a relevancia do seu compromiso e dinamismo, contribuíndo así a recuperar e recoñecer o seu legado.
A entrada é libre ata completar a cabida.
