As Ecobrigadas de Amicos iniciaron este 10 de maio os traballos de acondicionamento do río Sar, en Santiago de Compostela. A acción desenvólvese en colaboración con Viaqua, derivada da sinatura do convenio do pasado 14 de marzo co obxectivo de “traballar conxuntamente na inclusión das persoas con discapacidade e a sustentabilidade”. Estímase que as accións de recuperación ambiental no río Sar, e tamén no río Sarela, se estendan no tempo dous meses.
Dende Amicos declaran que a colaboración significa “a oportunidade para que 25 persoas con discapacidade intelectual poidan seguir mantendo os sus postos de traballo, continuar o seu proceso formativo e desenvolvendo o seu plan de vida”.
A asociación agradece a confianza depositada, especialmente a Ana Teijeiro, Yago Lorenzo e Leticia Rodriguez Hernández de Viaqua, xa que “as Ecobrigadas son unha iniciativa de economía social que necesita o compromiso de entidades como Viaqua que queiran apostar pola contratación responsábel”. Para Amicos, o convenio con Viaqua tamén implica “o inicio de unha relación cunha compañía líder no seu sector e coa que compartimos os valores do coidado medioambiental e da inclusión de persoas con discpacidade”.
Esta é unha das primeiras accións derivadas do dito acordo, aínda que xa se está a traballar noutras liñas comúns que se esperan poder realizar en datas vindeiras.
