A Praza de Abastos da Pobra do Caramiñal participa na campaña internacional Quere o teu mercado, que busca pór en valor o papel dos mercados municipais como axentes revitalizadores das vilas onde se atopan, ademais de “ofrecer un amplo abano de alimentos frescos e de calidade con atención personalizada”. O obxectivo, a maiores, é “fomentar o consumo de produtos de proximidade, contribuíndo tamén á dinamización da economía local”.
Así o fixeron saber este mércores 26 de maio concelleira da Promoción Económica, Charo Varela (Nós Pobra); a técnica municipal desta área, Sara Sánchez; e o responsábel do Mercado Municipal pobrense, Manuel Pardavila, que anunciaron que o 28 de maio, dende as 11.30 ata as 12.30 horas, desenvolverase na praza unha degustación de petiscos elaborados a base de produto local por parte da cafetaría do Centro Sociocomunitario e animación musical tradicional da man do grupo Trécola. A maiores, repartirase material promocional entre os praceiros e praceiras doado pola Xunta de Galicia.
Estas actividades adscríbense ao programa que impulsa a Dirección Xeral de Comercio e Consumo co obxectivo de apoiar, promocionar e reivindicar os mercados e os/as profesionais que traballan neles.
