Este 14 de abril foi dado a coñecer en Arzúa un innovador sistema tecnolóxico para contabilizar o número real de peregrinos que percorren as rutas xacobeas. Foi presentado nos seus detalles polo vicepresidente primeiro, Alfonso Rueda, dende o albergue de Ribadiso. Segundo fixo saber, trátase dunha experiencia piloto que complementa as estatísticas de Compostelas seladas na Oficina de Acollida ao Peregrino. O novo método, engadiu, pretende realizar a medición a través de teléfonos móbiles con Wi-Fi ou tecnoloxía Bluetooth instalados en determinadas zonas, neste caso en puntos estratéxicos do Camiño Francés, a ruta xacobea máis transitada.
Segundo explicou Alfonso Rueda, a tecnoloxía serviría para encher os baleiros de información sobre a verdadeira presenza de camiñantes nas diferentes rutas, xa que é previsíbel que as cifras sexan maiores do que permiten saber os ditos selos (que non son cruñados por todos os peregrinos) ou as diferentes metodoloxías de conteo da cidade de Compostela (hai peregrinos que non chegan até a capital de Galicia).
Ao acto tamén asistiron a directora de Turismo de Galicia, Nava Castro, e o delegado territorial da Xunta na Coruña, Gonzalo Trenor, así como representantes do Clúster Turismo de Galicia e das asociacións de amigos do Camiño de Santiago.
