Preto de 300 estudantes da ESO do IES da Pobra do Caramiñal acudiron na mañá deste 26 de abril ao Teatro Cine Elma, para asistir á representación da peza teatral A parábola do angazo, de Talía Teatro. Fixérono repartidos en dúas sesións organizadas pola Concellaría da Cultura para achegar ao público adolescente o valor do teatro. As sesións encadráronse no programa Lingua a Escena!, da Deputación da Coruña.
Antes de comezar as funcións, os estudantes foron recibidos pola concelleira Patricia Lojo (PSdeG-PSOE), quen, acompañada da técnica municipal, Fita Sanisidro, destacou o compromiso da Administración local coa cultura, que “se traduce na programación de numerosas actividades orientadas a diferentes rangos de idade ao longo de todo o ano”, sinalaron, ao que engadiron a dispoñibilidade do Concello para recoller todas aquelas accións propostas pola mocidade para o seu desenvolvemento na localidade.
No referido ao espectáculo, trátase dunha comedia dirixida por Diego Rey e protagonizada por Artur Trillo e Toño Casais, na cal se ofrece unha viaxe pola historia da nosa lingua fiada por unha coñecida lenda recollida polo Padre Sarmiento no século XVII. Enlázanse así diferentes episodios que explican o que sucede no presente.
