A Consellería de Medio Ambiente vai iniciar esta primavera os traballos para a elaboración do censo poboacional de sete especies de aves mariñas en Galicia. O contrato das tarefas a desenvolver foi adxudicado en tres lotes diferentes por un importe de case 64.000 euros. O obxectivo é ter un coñecemento exhaustivo e pormenorizado sobre as poboacións reprodutoras do corvo mariño cristado (Phalacrocorax aristotelis), a gaivota tridáctila (Rissa tridactyla), a gaivota patiamarela (Larus michahellis), a gaivota escura (Larus fuscus), o gaivotón (Larus marinus), o arao común (Uria aalge) e a pardela cincenta (Calonectris borealis).
A empresa adxudicataria disporá de 10 meses “para, entre outros traballos, peitear o litoral de Galicia con vistas a observar exemplares destas especies, así como determinadas áreas concretas de Rede Natura 2000, como a ría de Ortigueira e Ladrido, o complexo intermareal Umia-O Grove, a ría de Foz ou o complexo húmido de Corrubedo”.
Con este tipo de iniciativas dáse cumprimento ao Plan Director da Rede Natura 2000, que fixa obxectivos de conservación específicos dos espazos da área litoral, entre os que se atopan mellorar e completar o inventario das especies de interese comunitario nos espazos protexidos.
