Unha operación contra o tráfico de drogas desenvolvida no Barbanza acaba de culminar coa detención dun individo que, ao parecer, mantiña unha intensa actividade como camelo nas diferentes localidades desta comarca coruñesa.
Segundo informa a Garda Civil do Posto Principal de Boiro, o detido é un individuo veciño de Ribeira ao que se lle consideras presunto autor dun delito contra a saúde pública.
O operativo comezou o pasado mes de xaneiro cando “se tivo coñecemento por parte dos efectivos da mencionada Unidade da existencia dun home, veciño de Ribeira con antecedentes por feitos similares, que frecuentaba continuamente as localidades de Boiro, A Pobra do Caramiñal e Rianxo”, constatando que este home “relacionábase con outras persoas con antecedentes por tráfico e consumo de drogas sen que entre eles houbese ningún tipo de relación”.
No transcurso dun dispositivo, a Garda Civil interceptou ao agora detido “cando mantiña unha entrevista con outra persoa da localidade de Boiro, séndolle achadas ocultas no vehículo no que viaxaba un total de 38 dose de cocaína, preparadas para a suposta venda e consumo entre drogodependentes da comarca”. Así como 1625 € “froito das supostas vendas de droga realizadas”.
Desta forma, a Garda Civil procedeu á detención desta persoa como presunto autor dun delito contra a saúde pública, á incautación dos efectos atopados, así como do vehículo utilizado sendo postos a disposición xudicial do Xulgado de Primeira Instancia de Ribeira.
